Trending ha facebook an post ni Shawn Carlo Arias kun diin makikit-an an mga litrato han mga MCH tricycle nga nakaparada o nakapila ha ligid hiton SM ha may Salazar St. Syudad han Tacloban.
Ha facebook status niya, nasiring nga sumakay daw an iya Lola ha usa nga tricycle pero tigda daw humaw-as ini kay ginsusukot an iya Lola hin doble nga pamasahe. Tikadto man la daw an iya Lola ha may EVSU. An pakiana ni Arias, sobra na 70 an edad han iya Lola ngan Senior Citizen na ini ngan papapasahion pa ba hin doble? Ngan legal ba daw ini nga pagpila-pila hiton mga tricycle?
An naging aksyon han RMN, gintawagan namon an namamangulo han TOMECO nga hi Noli Naval pati na liwat an lola nga nagrereklamo.
Sumala kan Lola Edit, tagpira gud it pamasahe?
Sumala naman kan Naval, 6 o 7 iton pamasahe ha downtown area ngan diri na malampas ini ngan tagan gad hin pabor ilabi na iton mga Senior Citizen.
“Ini nga mga senior citizen may special nga balaud ini ha ira ngan angay nga tagan ini hira hin pabor labi na kun nasakay hiton pampubliko nga sarakyan.”
Una daw ha balaud, waray katugutan ini nga mga MCH drayber nga maghimo-himo hira han ira kalugaringon nga terminal ngan kun may mga reklamo kinahanglan i-plastar ha ira buhatan para hira masayod ngan tikitan ini nga mga abusado daw nga mga MCH driver.
“Diri ito hira gintututgutan nga maghimo hin ira kalugaringon nga terminal sanglit kun may naagi nga patrol hiton TOMECO, ginsisita namon ito hira o di ngani gintitikitan.”
500 pesos an sirot ha mga tricycle drayber nga dako iton sukot ha ira mga pasahero ngan sugad gihapon hini nga kantidad pag naghihimo hira hin ira kalugaringon nga terminal.
An problema, waray kakuha ni Lola pati han iya apo an police number han MCH sanglit diri matitikitan an nagsusukot unta ha ira hin doble nga pamasahe.
