Lola sa mga bata na naluwas sa disgrasya sa Payawan 1 Brgy. Luna,Surigao City nagpakilooy sa mga may malumo na kasing-kasing para mapailayom sa CT scan an mga apo
Emosyunal na nagpakitabang sa RMN DXRS ug sa tanan may malumo na kasing-kasing na mga Surigaonon an lola na si Mirasol Padao, 46 anyos para mapailayom sa CT scan an duha ka mga apo na nagpangidaron nan 2 anyos ug 5 anyos human nalambigit sa disgrasya kagabii sa Payawan 1, Brgy. Luna, Surigao City na miresulta sa kamatayon sa magtiayonng Jennifer ug Jhuney Labandero.
Sumaya pa ni Mrs. Padao, grabe an problema na tagsagubang sa ila pamilya kuman, gawas na namatay an ija anak na si Jennifer, nabayaka sija sa sitwasyon sa ija duha ka apo na nolagpot gikan sa tagsakyan na tricycle sa dihang nadisgrasya labi na kay an 2 anyos na bata tuyo ka higayon na sige nagsuka basin naapektuhan an uyo sa panghitabo, lakip na an 5 anyos na bata an dako isab an butoy sa uyo.
Tagtudlo niini, wayay gajud ila kuwarta ugsa na naglaum na lamang sila kon sin-o an makatabang. Dugang pa ni Padao, tagtakda pa isab nija na plastaron sa punerarya an ija anak na namatay lakip an bana na kasamtangan adto pa sa Aldonza Funeral Homes.
