Lolo arestado matapos nga magpaeopok it baril

New Washington — Arestado rong sangka 67-anyos nga lolo matapos nga magpaeopok it anang baril sa Brgy. Jugas, New Washington, Aklan kabii.
Ro suspek nakilaea kay Rodolfo Remetio ag residente man nasambit nga lugar.
Suno sa report it New Washington PNP nga sangka tawag ro andang nabaton halin sa sangka concerned citizen naga ayo it police assistance angot sa pagpinaeopok it baril ko suspek ag insigida man nanda nga gin respondehan.
Pag-abot it mga kapulisan, nag hana pa nga mga maeagyo rong suspek. Bangod nga imaw ra may sakit ag para nga indi magulpihan kon arestohon hay nagpatigayon it checkpoint ro mga kapulisan ag naaresto ro suspek sa may Sitio Ilaya it nasambit nga barangay.
Na recover sa suspek ro anang cal. 45 nga baril ag daywa ka mga magazine kung sa siin ro sambilog loaded it lima ka bala ag rong sambilog loaded it 7 ka bala nga uwa it nagakaigo nga papeles.
Sa makaron hay detained sa lock up cell it New Washington PNP rong suspek ag posible magapangatubang it nagakaigo nga kaso.