LOLO NAG-AKO PAGPATAY SA BATA NGA IYA NA GINAKABIG APO. ( Editor’s Note: This article features disturbing content)
Kaso nga murder atubangon sang isa ka lolo matapos iya gin-ako nga siya gid man ang nagpatay sang iya menor de edad nga himata bangud sang kaakig sa Brgy. Riverside, banwa sang Isabela.
Ang suspek ginkilala kay Pablo Talanas, 56 anyos, balo, isa ka manugbaligya isda kag pumuluyo sang Sitio Aguntilang, Brgy. Riverside, Isabela, samtang, ang biktima isa ka lalaki nga ginatawag lang kay Alyas Robot, grade 1 pupil kag ginakabig na nga apo sang suspek.
Suno sa case investigator sang Isabela Police Station nga si PSSg Janet Untal, pasado 8 kagab-I sang nag-abot sa ila istasyon ang suspek, boluntaryo nga ginturn-over ang iya kaugalingon kag verbal nga gin-ako nga siya ang may kahimuan sang krimen.
Base sa panaysayon sang suspek, sadtong Domingo (May 26, 2019) may mga las 6 sang gab-I sang natabo ang krimen sa sulod mismo sang iya balay kon diin ini siya ang naka-inom kag naakig sa biktima bangud sobra ini ka “kulit.”
Siling sang suspek bangud sang kaakig, iya ginkuga ang biktima kag ginbunggo ang ulo sini sa semento sang makapila ka beses.
Ginpahayag sang suspek nga pagkatapos sang krimen, iya ginbitbit pagwa sang ila balay ang biktima kag ginbilin sa idalum sang puno sang kahoy.
Sang amo man nga gab-I, isa ka lalaki ang nakalabay sa lugar kag didto iya nakita ang biktima nga wala na sang kabuhi.
Sa resulta sang post mortem examination nga ginpatigayon sang medico legal officer sang banwa sang Isabela, napatay ang biktima bangud sang samad sa iya ulo tuga sang pagkalampos kag may ginbutang gid man nga bagay sa iya buli.
