ISABELA, NEGROS OCCIDENTAL – Gindala sa ospital ang isa ka lolo matapos ini nga ginbuno sang iya kaugalingon nga apo pasado las 3 sang kaagahon sa Sitio Tacong, Brgy. Sikatuna, banwa sang Isabela.
Ang biktima nakilala kay Danilo Quirante, 59 anyos ang edad samtang ang apo naman nga suspek ginkilala kay Junrey Gador, 27 anyos ang edad lunsay pumuluyo sang amo nga lugar.
Suno sa imbestigasyon sang Isabela PNP, si Lolo Danilo ang yara sa sulod sang iya balay sang ini ang nakabati sang lupok sang pusil gani gilayon ini nag-gwa kag nagsinggit kon sin-o ang nagpalupok.
Apang, ini ang ginpalapitan sang iya apo kag hinali na gid lamang nga ginbuno kag naigo ang biktima sa iya kamot, agtang kag dughan.
Ginhingagaw dala ang biktima sa Ignacio Arroyo Memorial District Hospital samtang gilayon naman nga nagpalagyo ang suspek.
Sa karon ginapangita na sang utoridad ang suspek samtang gina establish naman ang motibo sang krimen./dyHB BACOLOD
