TALISAY CITY, NEGROS OCCIDENTAL – Panibag-o nga kaso sang ginasiling “crime of passion” bana nagtiro, nagbuno kag naglabo sa ginasuspetsuhan “kerido” sang iya bana sa ciudad sang Talisay.
Sa imbestigasyon sang Talisay City Police Station, ginalantaw nga love triangle ang motibo sang natabo nga pagtiro sang suspek nga si Sonny Boy Gregorio, 31 anyos ang edad sa ginaalegar lover sang iya asawa nga si Erly Gregorio, 31 anyos ang edad lunsay pumuluyo sang Brgy. Pandanon, Don Salvador Benedicto.
Nakilala ang biktima nga si Marlon Gozon, 43 anyos ang edad, tumandok man sang Salvador Benedicto.
Ang insidente natabo sa balay ni Joelito Udtujan, tiyo sang asawa nga si Erly Gregorio sa Brgy Dos Hermanas, Talisay City, mga las 8:20 kagab-i.
Base pa sa imbestigasyon, Disyembre sang tuig 2017 sang nagkadto si Erly sa balay sang iya tiyo nga si Joelito upod si Marlon nga iya ginpakilala nga nobyo.
Ang mag-asawa ang may bata nga duha ka bilog, 15 anyos kag kag 10 anyos.
Base sa panaysayon sang isa pa gid ka tiyo ni Erly nga si Rogelio nga ginhambalan sila ni Erly nga nagbulagay na sila ni Sonnyboy kag si Marlon ang bulag man sa iya asawa.
Lipud sa ihibalo ni Erly, ini siya ang gina-monitor gali ni Sonnyboy kag posible may nakahatag sa iya sang impormasyon nga ang iya asawa ang yara sa iya tiyo sa Talisay.
Bangud sini, natigayon gid sang bana ang iya pagtimalos pinaagi naman sa pagkadto sa balay ni Joelito kon diin didto iya naabtan gamay nga payag payag sanday Erly kag Marlon nga nagahulid las 11 pasado kagab-i.
Gintiro ni Sonnyboy si Marlon sang makapila ka beses kag wala pa siya nakuntento diri, iya pa ginlabo kag ginbuno ang biktima nga nagresulta sang kamatayon sini.
Matapos ang insidente, gilayon nga nagpalagyo si Sonnyboy, samtang, si Erly naman ang missing.
Bangud sini, ginapamangkot sa karon kon bala diin si Erly, ayhan ini ang nagpalagyo man ukon ini ang gindala ni Sonnyboy.
Narecover sa crime scene ang isa ka binangon nga nagalaba sang 20 inches kag 2 ka wala naglupok nga bala sang .38 calibre nga revolver./Albert Giner photos
