Sa interview sa RMN Malaybalay ngadto kang LTFRB-X Regional Director Aminodin Allan Guro, gibutyag niini nga magpabilin gihapon ang minimum fare sa mga pampublikong sakyanan tungod kay wala pay bag-ong taripa nga makapauswag niini.
Apan matud pa niya nga adunay gi-consolidate nga petition sa mga transport groups sa tibook nasud alang sa pag-uswag sa pletehan.
Ginaduso sumala pa karon ang pag-uswag og P5.00 sa pletehan, og maaprobahan kini mu-uswag na gikan sa P9.00 ngadto sa P14.00 ang minimum fare.
Pagklaro usab niya nga dili pud mahitabo nga magkapareha ang pletehan diri sa Rehiyon-X ngadto sa kauluhan sa NCR. Ubos-ubos gayud sumala pa og mga P2.00 ang pletehan diri kung itandi sa kauluhan.
Panghimangnu usab ni Guro ngadto sa mga operators sa mga pampublikong sakyanan nga dili magpasagad sa pagpamasahero, boot pasabot nga dili basta-basta magpasaka sa pletehan nga walay basihanan.
Pasalig usab niya nga naglantaw ang gobyerno sa problema sa mga drayber ug operators tungod kay kabalo kini nga sila maoy labing naapektuhan sa nasinatiang pandemya.
