Giawhag ni Land Transportation Office kon LTO Regional Diresto Oscar Salcedo ang local nga kagamhanan ning syudad nga mohimo na ug guidelines kon mopasa na ug City Ordinance aron mag-regulate sa mga motorized sikad ug tri-cab dinhi sa syudad sa Cagayan de Oro.
Nasayran nga ubay-ubay na ka mga tri-cabs ang nagdagan sa kadalanan ning syudad ug usahay gapulihan na ang mga motorela nga sagad gasakyan sa mga pasahero. Apan gikabalak-an ni Salcedo tungod sa dala nga peligro sa maong salakyan diin gakarga ug mga pasahero ilabina sa highway ug sentro sa syudad nga walay permit unya’g makasugamak ug aksidente.
Gihimo ni Salcedo ang maong panawagan tungod sa laing kamatayon sa usa ka driver sa tricab nga mibangga sa nakaparadang trailer truck sa Brgy. Puerto sa syudad kagahapon sa buntag.
Matud pa ni SPO3 Joseph Israel, Imbestigador sa Puerto Police Station 6 nga ila nang gipangita ang driver sa truck aron manubag sa kamatayon sa biktima nga si Alberto Erroisa, 48-anyos, residente sa Brgy. Tablon ning syudad.
Nasayran nga nawad-an ug preno ang gimaneho ni Alberto maong mipasok kini luyo sa trailer truck.
Idol, aduna ka bay reaksyon kalabot ning maong estorya? Mamahimo kang maka-post ug comment sa ubos.
