Nagdeploy umpisa subong nga semana sang marshalls ang Land Transportation Office (LTO) 12 (Soccsksargen) agud magmonitor sa mga public utility vehicles (PUVs) sa implementasyon sang mga ini sang health protocols. Suno kay LTO 12 Regional Director Macario Gonzaga nga ang mga marshalls ang magasakay sa mga PUVs halin sa mga terminals kag obserbaran ang ila nga operasyon base sa naaprobahan nga regulasyon kag health standards sa tunga sang nagapadayon nga paandam sang coronavirus disease 2019 (Covid-19) pandemic. Pahayag ni Gonzaga nga sakop sang deployment sang marshalls sang ahensya ang pili nga rota sa apat ka mga probinsya kag syudad sa rehiyon. Magasebi naman suno pa ang mga ini nga agent’s kag idokumento ang mga posible bayolasyon sa health protocols sang mga PUVs. Lakip sa imonitor sang mga ini ang ginapasugtan nga kapasidad, pagtuman sa physical distancing kag mandatory nga pagsuksok sang face masks kag face shields. Ginkumpirmar ni Gonzaga nga ang magbayolar ang gilayon nga ireport sa pinakamalapit nga police station para sa pagpasaka sang nagakaigo nga reklamo. May-angot sini, ang nagapanag-iya sang salakyan ukon ang operators sang PUVs ang papanaugan sang pinalidad sang Land Transportation Franchising and Regulatory Board (LTFRB), lakip na dire ang pagrecall sang ila nga permits. Dugang pa ni Gonzaga nga nagdesisyon sila nga ipatuman ang nasambit nga istratehiya sa koordinasyon sang LTFRB-12 agud nga aksyunan ang reklamo sang pipila ka mga commuters nga may pipila ka mga PUVs ang wala nagasunod sa minimum health protocols. Ginhatagan punto sang regional director nga kinahanglan suno pa nga ipatuman ang nasambit nga tikang agud nga mapunggan ang paglapta sang virus matapos nga padayon ang pagsaka sang kaso sang Covid-19 sa rehiyon.
