Davao City – “Naa sa tao na.”
Kini ang numero unong hinungdan nga nasiplatan si Land Transportation Office (LTO-XI) regional director Atty. Gomer Dy agig reaksyon sa mokapin 10,000 ka mga tawong na-isyuhan ug citation tickets o arestado gumikan sa kalapasan sa anti-jaywalking regulation ug uban pang mga traffic rules.
Sa interbyu sa programang ‘Kolokabildo Sa Radyo’ uban ni Kasamang Joel Viray, gibutyag ni Dy nga anaa gayud sa batasan sa tawo ang pagtuman ug dili pagtuman sa atong mga balaud ug mga regulasyones.
Pananglit panahon sa kalamidad sama sa baha, adunay mga tawong bisa’g unsaon pagpasidaan nga mo-bakwit ngadto sa mas luwas nga dapit, gahi gihapon og ulo sama gihapon diha sa pagtuman sa mga road rules and regulations, segun sa hefe sa LTO sa rehiyon.
Kahinumdoman nga naka-isyu na ug 10,552 ka citation tickets ang City Transport and Traffic Management Office (CTTMO) ngadto sa mga malapasong drayber ug jaywalkers.
Una niini, nakasaway mismo si CTTMO Head Dionisio Abude ngadto sa mga violators gumikan haguka gihapon sa disiplina ang katawhan kalambigitan sa pag-imposar sa atong mga balaud.
RadyoMan June Duterte
