Davao city – Magsugod na og isyu ang Land Transportation Office kun LTO XI sa driver’s license cards nga dunay five-year validity sugod karong bulana.
Kini ang gikumpirma ni LTO XI Director Atty.Gomer Dy sa AFP-PNP Press Conference kaganinang buntag diin magsugod ang pagisyu sa nasangpit nga lisensya karong Setyembre 22.
Sumala ni Director Dy nga una makadawat sa five-year validity kadtong mga nag-apply ug nag-renew sa lisensya kaniadtong Nobyembre 2 kutob Disyembre 2 sa tuig 2016.
Plano sa Direktor nga himoon matag bulan ang pag-release sa lisensya aron dili maghuot ang mga tawo sa ilang buhatan.
Sigun sa opisyal, nagsaad ang ilang supplier nga magpadala og 120,000 ka mga cards aron makibhangan ang 150, 000 ka backlog sa bag-ong mga lisensya.
Gipasalig ni Director Dy nga mapaspasan ang pag-release sa bag-ong mga lisensya gani magpadala ang ilang central office og usa ka printing machine nga muabot sa lunes dugang sa presenteng duha ka ekipo karon nga anaa sa ilang buhatan.
Sa karon, gipailawom na sa pagbansay ang mga ginsakpan sa LTO XI kung unsaon paggamit sa mga ekipo alang sa pagprinta sa driver’s license nga dunay five-year validity.
Kasamang Joel Viray
