Davao City – Gi-anunsyo sa Land Transportation Office 11 (LTO-XI) ngadto sa katawhan nga mamahimo gihapon i-claim sa ilang opisina ang mga plaka nga kaniadto pang July 2016-Dec 2017 ang releasing date.
Gitino ni LTO-XI administrative division officer Christopher Blason nga alang lang kini sa mga four wheel vehicles ug wala pay labot sa mga motorsiklo.
Base sa ilang datos, aduna nalang 11,040 ka mga pares sa plaka ang wala pa na-claim diin kagahapong adlawa, 7,947 na ilang na-release.
Segun ni Blason nga ang kinahanglan lang dalaon mao ang original nga ORC, apan kung wala mamahimong dalaon nalang ang photocopy, valid ID sa tag-iya ingon man sab valid ID sa mu-claim sa plaka.
Gibutyag sa admin officer, aduna nay QR code ang matag plaka diin kini gilangkuban sa mga impormasyon sa sakyanan sama sa engine number, chases number, plate number ug file number.
Dugang pa, adunay Radio Frequency (RF) ID sticker nga ibutang sa windshield likod sa rear view mirror sa sakyanan diin nagbaton sab kini sa impormasyon sa sakyanan sama sa engine number, file number, plate number, color ug validity sa rehistro.
Pahimangno ni Blason nga kuhaon na kini una ang mag Enero 2019 sanglit manakop na ilang mga opisyal sugod sunod tuig.
RadyoMaN Jason Amisola
