Nagpanugyan ang medical director sang Corazon Locsin Montelibano Memorial Regional Hospital sa (CLMMRH) sa Inter-Agency Task Force sa ciudad sang Bacolod nga balikan ang mga lugar sa diin may nag-positibo sa COVID-19 kag magpatigayon sang targeted massive testing.
Suno kay Drilon, dapat nga magbalik ang IATF sa Purok Sabes, Brgy. Villamonte sa diin nagpositibo sa COVID-19 ang napatay nga 69-anyos nga lalaki kag sa Purok Bayanihan, Brgy. Banago sa diin narekord man ang 62-anyos nga babaye nga COVID-19 positive, kag dapat nga magpatigayon sang random swab sampling sa bisan sa 50 ka residente.
Sa masobra 600,000 nga populasyon sang Bacolod, dapat nga makapatigayon man sang swab sampling sa minimum 30,000 ka residente agud mahibaluan ang matuod nga sitwasyon sang COVID-19 sa Bacolod, suno kay Drilon.
Sa pagbanta man ni Drilon, magalawig pa sa bulan sang Disyembre sini nga tuig ang paglapta sang coronavirus, gani indi dapat magpakampante ang mga Bacolodnon.
[image: image.png]
