Dakong kalipay sa mga katawhan sa lungsod sa Glan gumikan makadawat na sila sa cash assistance ilalum sa programa sa gobyerno nga SAP kon Social Amelioration Program. Sila ang unang batch nga matagaan sa tibuok Sarangani Province. Singko Mil ka pesos (P5K) kada bulan, Dyes Mil ka pesos (10K) ang kinatibuk-ang makuha sulod sa duha (2) ka bulan.
Ato lang adlaw nga Miyerkules, Abril 15, unang natagaan ang mga kwalipikadong pamilya sa Barangay Mudan ug sa Barangay Tapon, Glan. Gani, sila Tapon Kapitan Ronald Canoy ang nagpasalamat ngadto nila Pangulong Rodrigo Duterte, Governor Steve Chiongbian Solon ug Glan Mayor Vivien Yap tungod wala pasagdi matud pa ang mga pobreng residente nga labing naapektuhan sa mga gipatuman nga lockdown tungod sa Coronavirus.
Sa tibuok Sarangani Province, 59,874 kabuok household/pamilya ang makadawat sa maong ayuda sa gobyerno partikularminte sa DSWD National ug sa opisina ni Region 12 DSWD Regional Director Cezario Joel Espejo. Suma total, P299.3 Milyones ka pesos ang gigahin sa nasyonal nga panggamhanan sa SAP emergency subsidy alang sa Sarangani, matud pa ni Ms. Raquel Panal, ang labaw sa PSWDO Sarangani. Wala pay labot dinhi ang ayudang pinansyal alang sa mga myembro sa 4Ps ug kadtong nakasulod sa programang TUPAD o Tulong Panghanapbuhay sa Ating Disadvantaged/Displaced Workers ilalum sa Department of Labor and Employment ug sa uban pang ahensya sa gobyerno, sama sa Department of Transportation ug Department of Agriculture.
Aminado ang kadaghanan nga ang SAP program ang gikagubtan sa tibuok Pilipinas tungod sa pipila ka mga isyu, sama na lang sa limitadong pagpili ug mahulog nga dili tanang apektado ang benipisyaryo. Rason nga sa mensahe ni Pangulong Duterte atong adlaw nga Lunes, gimanduan niini ang DSWD ug DILG nga magpahigayon og ikaduhang survey aron kadtong wala malista ang matagaan. Segun sa Presidente, dili kini maka-ako nga mamatay ang usa ka Piipino tungod sa kagutom.
Samtang wala pa ang maong pag-resurvey, anaa man pud ang lokal nga gobyerno padayong nagahatag sa relief goods. Dili kinahanglan nga maghulatanay inay mag-inisyatibo tungod anaa may tagsa-tagsa ka calamity fund ug 20 percent development fund ang matag barangay, munisipyo ug probinsya. Aduna nay mga local official sa tibuok Pilipinas ang gipatubag karon sa opisina ni DILG Secretary Eduardo Año sa pagkaang-kaang sa paghimo og mga lakang, kaso ang abuton sa mga mapamatud-an.
Sa halos mga munisipyo sa Sarangani Province, unang nihatag sa relief goods sa mga tao mao ang barangay council, gisundan dayon sa munisipyo. Ang ayuda sa Kapitolyo sa Sarangani ang ginahatag kini sa matag lungsod aron centralized ang paghatag sa mga kabarangayan.
Mapasalamaton na lamang ang mayor sa Glan ngadto ni Congressman Ruel Pacquiao tungod sa gihatag niini nga mga ayuda ngadto sa mga katawhan ug sa mga frontliner, kauban ang pagduyog ni Senador Manny Pacquiao. Gidayig usab niini si Governor Solon tungod anaa matud pa ang Gobernador sa tanang panahon naka-alalay kanila magamay man o dako nga problema. Sa pagsuporta kana nila Vice Governor Elmer De Peralta ug sa tanang board member.
