*Bacolod City* – Ginreklamo ni Rosendo Castillo Jr, isa ka katapo sang Home for the Blind nga nahamtang sa Barangay Mansilingan, Bacolod City nga baho ang rice subsidy sang syudad para sa ila.
Suno kay Castillo, mga 15 ka kasako ang ginhatag sa ila sang syudad sang Abril 18 paagi naman sa isa ka supplier kag ginreceive man ini sang ila presidente nga si Elmer dela Cruz.
Para kay Castillo, delikado ang bugas ilabi na sa mga bulag nga nagabalatian kag nagabatyag sang diabetes.
Ginklaro naman sang Department of Social Services Division (DSSD) social worker Vangie Abaring mismo ang mga bulag ang nag-decide nga batunon nalang ang amu nga bugas bangod wala na sila sang tilig-angon. Apang kon wala nila ini ginbaton, obligado man kon tani ang supplier nga mag-ilis sang klase sang bugas apang indi na sa 15 ka sako.
Kada tatlo ka bulan ang syudad, ang nagahatag sang P37,500 nga balor sang bugas sa Home for the Blind bilang rice subsidy.
Nagpasalig naman ang DSSD nga masunod nga mga subsidy mangin manami na ang quality sang bugas ang ila ihatag bangod gin-call na nila ang attention sang supplier.
May ara sang 49 ka pamilya sa Home for the Blind, sa duta nga gindonar naman sang isa ka pribado nga indibidwal.
Sang una, tseke pa ini ang ginakuha sang mga bulag kag sila nalang ang nagabakal, apang sa ulihi ginbawal ini sang Commission on Audit (COA).
