Malipayong gipanghinaot sa pamunuan sa Cagayan de Oro City Jail – Male Dormitory ang usa ka luwas ug mabungahong bag-ong tuig 2019 sa tanan.
Matud pa ni City Jail Warden, Supt Erwin Kenny P Ronquillo nga malipayon ug malaumon ang pagsugat sa bag-ong tuig dala ang mga kalampusan nga natagamtam sa City Jail – Male Dormitory sa tuig 2018.
Mahinumduman nga sa tuig 2018, nagkalainlaing pag-ila ug pasidungog ang nadawat sa Cagayan de Oro City Jail – Male Dormitory tungod sa kalampusan sa mga nagkadaiyang mga programa niini alang sa mga binilanggo kon Persons Deprived of Liberty ug alang usab sa komunidad.
Nag-una niini ang pagkahimong CERTIFIED DRUG FREE FACILITY, pagdaog sa RED ORCHID AWARD 2018, pasidungog sa GAWAD PENOLOHIYA, pagkahimong BEST CITY JAIL sa Rehiyon sa pipila ka quarters, paglampus sa mga DECONGESTION PROGRAMS nga miresulta sa pagkunhod sa gidaghanon sa mga binilanggo gikan sa 2,900 sa unang bulan sa tuig 2018 ngadto sa 1,600 na lang niining Bulan sa Disyembre.
Kini ug uban pang mga kalampusan ang nag-aghat sa pamunuan sa Cagayan de Oro City Jail – Male Dormitory sa dugang pang pagpaningkamot aron malampasan pa sa 2019 ang kasamtangang kadaugan alang sa katumanan sa mandato niini sa balaod nga safekeeping and development of Persons Deprived of Liberty alang sa mas luwas nga katilingban.
Gipaabot usab ni Supt. Ronquillo ang kinasingkasing nga pasalamat niini sa mga tawo ug grupo nga nitabang sa mga kalampusan sa 2018.
Lakip sa gipasalamatan niini ang BJMP National Headquarters og Regional Office alang sa gitukod nga edipisyo alang sa City Jail nga mokabat ngadto sa 45 Million; Local Government of Cagayan de Oro ubos sa pagpanguna ni Mayor Oscar Moreno nga nagpatukod sa hapit na mahuman nga Jail Building nga mokabat og 19.2 Million, Infirmary nga 5 Million, Kitchen nga 2.5 Million ug sa idugang pa niini nga 10 Million alang sa pagtibawas og pagpalit sa mga ekipo alang sa gitukod nga buildings.
Kabahin usab sa kalampusan ang mga government agencies; NGOs; Community Organizations og uban pang mga tawo nga adunay maayong kabubut-on nga mitabang sa kabag-ohan sa mga binilanggo sa City Jail – Male Dormitory.
