Nabalaka sila suno kay Surallah Mayor Antonio Bendita sa madasig nga pagsaka sang kaso sang COVID-19 sa banwa kag indi na halin sa mga locally stranded individual ang virus kundi dire na sa lokal amo nga mabudlay nga mamonitor.
Sa datos sang Abril 29 yara na sa onse ang aktibo nga kaso sa banwa.
Suno kay Mayor Bendita nagagwa man nga ang super spreader sang virus ang mass gatherings. amo nga nagpaggwa siya sang Executive order no.16 nga pagpatuman sang dugang nga polisiya sa sulod sang duha ka semana nga mag-epektibo subong nga adlaw Mayo 1 tubtob Mayo 14, 2021 agud mapunggan ang paglapta sang COVID-19.
Nabalhag sa EO no. 16 nga suspendido ang distribution, submission kag retrieval sang mga modules sa tanan nga public kag private schools sa banwa.
Suspendido man ang tanan nga mass gatherings kapareho sang mass, religious activities, kasal, bunyag, birthday party kag iban pa nga social gatherings.
Samtang ginadumilian man ang mga empleyado sang LGU nga magtambong sa mga meetings,trainings, workshops, conferences kag seminars nga ginapatigayon sang mga regional, provincial offices kag iban pa nga ahensya.
Wala man ginapahanugutan ang pagpatigayon sang trainings, seminar, conferences kag examinations sa mga public kag private schools sa banwa.
Limitado man sa pito ka adlaw ang haya sa patay kag ang mga immediate families lang ang magtambong sa diin ang pamilya ang kinahanglan nga magkuha sang clearance sa Municipal Health Office.
Ginabawalan man ang mga ambulant vendors kag ang mga nagabaligya sang ukay-ukay nga halin sa iban nga banwa.
Sarado man sa sulod sang duha ka semana ang tourism areas kag iban nga recreational activities, mga beauty and wellness shops, mga internet cafe, gyms kag mga bilyaran.
Bawal man ang mga sport activities kag suspendido ang operasyon sang Lamian Satellite Market.
Apang ginsiguro ni Mayor Bendita nga sa tion nga magnubo ang kaso sang COVID-19 sa banwa i-lift man ang nasambit nga polisiya tungod indi man pwede pabay-an ang ekonomiya sang banwa.
Awhag niya man sa katawhan nga maghalong kag padayon nga ipatuman ang minimum health standard.
