BACOLOD CITY – Masobra isa ka tuig na nga nagpadangat sang iya reklamo sa DepEd Regional Office 6 ang principal sang Paglaum Village National High School, PVNHS batuk sa isa ka maestra diri apang tubtub sa karon wala ini nahatagan sang kasulbaran.
Suno kay Mam Lourdes de Paula, Principal 3 sang PVNHS nga January 2017 sang pormal nga ginfile ang reklamo batuk sa maestra nga si Emmiline Mercurio bangud sang conduct unbecoming kag masami nga pagpang-harass sini sa iya mga co-teachers kag bisan sa iya man mismo.
Sang nagligad nga Lunes, Hunyo 25, ginpablotter ni de Paula kag sang isa pa gid ka manunudlo sang Paglaum Village National High School nga si Lilia Limguanco si Mercurio bangud ginpakahuy-an siya sini durante ginapatigayon ang General PTA Assembly meeting sa ila eskwelahan sadtong June 22.
Ini ang ginsundan pa gid sang reklamo sang kapin 36 ka mga estudyante batuk sa iya kag sang isa pa gid ka maestro nga nag-alegar ginpatup-an ni Mercurio kon diin napalab-ot na ini sa Division Office ang DepEd.
Ginpahayag sang principal nga sa iya obserbasyon, may personalidad si Mercurio nga indi ma-itiendihan bangud kon kaisa maayo man ini kag kon kaisa mainiton ang ulo.
Apesar sini, ginsiling ni de Paula nga ginhatagan gihapon sang due process ang maestra.
Samtang, sa iya naman nga bahin, hugot nga gina-deny ni Mam Emmiline Mercurio ang tanan nga akusasyon batuk sa iya kag nagsiling, ini ang himo-himo lang sang principal kag siya ang mastermind sang tanan nga akusasyon batuk sa iya bangud sang personal nga rason.
Suno kay Mercurio utang ang ginhalinan sang ila issue sang principal kon diin halos duha ka tuig na nga nakahulam sa iya si de Paula sang kapin P40 mil pesos apang tubtub subong wala ini nabayaran.
Ginaakusahan ni Mercurio ang principal nga naga-gamit sang iya authority kag gina influensyahan ang mga manunudlo kag estudyante agud na matabunan ang wala na-liquidate nga gin-gamit nga pundo sang eskwelahan bangud wala sang transparency sa pagdumalahan sini.
Pahayag ni Mercurio nga indi siya kundi si de Paula ang dapat i-reklamo sa DepEd bangud sang mga eskandalo sa iya personal nga kabuhi kon diin nagpakig-relasyon ini sa isa ka lalaki nga may asawa.
Sa karon suno kay Mercurio, nagkuha na siya sang abogado agud nga magpangapin sa iya sa tanan nga akusasyon nga ginabato sa iya.
Angut sini, ginapaabot ang paghatag aksyon sang DepEd sa amo nga kontrobersiya sa Paglaum Village National High School bangud indi ini maayo nga ehemplo para sa mga estudyante./dyHB BACOLOD
