Un maestra del un escuela publica de elementarya ya sale arestao despues ya recobri shabu na su possession na checkpoint del pulis na San Roque enante aga.
Junto con el maestro, arestao tambien el un tsuper de haba-habal donde le ta munta.
El jefe del Sta. Maria Police Station si Supt. Mark Azury a nombra con el maestra como si Esmeralda Alpez Gregorio, 34, casao ta queda na Lunzuran y ta insinia na Lumbayao Elementary School na Mercedes.
Arestao tambien si Nicholai Bazan, 34, casao de Tetuan el tsuper del habal-habal donde ta munta si Gregorio.
Na report del Sta. Maria Police Station ta aparese banda alas 2 del aga ta conduci checkpoint el maga pulis que ta encabesa si Supt. Nonito Asdai na calsada del San Roque serca cuando ya pasa canda Gregorio y durante el checkquida, ya puede recobri el maga pulis desde na su shoulder bag 3 paquete de shabu y cuantos drug paraphernalia inclujido el un digital pesador.
Con canda Gregorio y Bazan ya tene que lleva na Sta. Maria Police Station para el plantada de caso na corte.
