GENERAL SANTOS CITY – Himas rehas sa presinto sa kapolisan ang mag-igsuon nga sagal na matod pa sa pagpangawat human silang naaktuhan nanglungkab og piso net pinaagi sa cctv footage nga gi-install sa internet cage sa Purok Bagong Silang Labangal ning dakbayan niaging gabie.
Giila sa imbestigasyon sa kapolisan ang mga suspek na silang Jon Gibson Yales 18 og Sunny Yales 23 nagpuyo sa Purok Bagong Silang sa maong barangay kung asa gireklamo sa usa ka Jemuel Jude Navoa 21 anyos tig-bantay sa internet shop.
Nasayran nga unang gisulayan sa duha lungkabon ang piso net niaging adlawng Byernes apan napalpak hinungdan gibalikan sa Lunes sa gabie pagpamatuod sa ilang krimen nga nahimo mao ang kuha sa cctv.
Gipailawom sa medical examination ang duha og gipaslak dayon sa selda sa Makar Police Station nga takdan pasakaan og kaso karong adlawa Myerkules.
