Alabel, Sarangani Province–Mobalor sa kapin 100,000 pesos ang gibana-banaang damyos sa balay nga nasunog nga gipanag-iyahan ni Lola Milagros Aniñon, 66 anyos, byuda kansa napatay sa maong sunog kauban ang iyang apo nga si Jasper Aniñon, 12 anyos pasado alas 3:00 sa kadlawon sa Purok 2, Brgy. Ladol, Alabel, Sarangani Province.
Sumala pa ni Municipal Fire Marshall sa Alabel Fire Station Senior Inspector Eugenio Mangilay nga una silang nakadawat ug tawag kalabutan sa maong panghitabo.
Gilayon man usab nilang girespondehan apan paghidangat nila sa lugar gilamoy na sa kalayo ang balay gumikan gama lamang kini sa light materials.
Dugang pagbutyag sa opisyal nga sa ilang inisyal nga imbestigasyon nasuta nga nagikan sa kwarto ang sunog asa nakasirado ang mga pultahan sa balay sa mga biktima.
Nagtuo ang opisyal nga basin hinanok sa pagkatulog ang maong lola gumikan kay wala kini nakahawa sa gitulogang katre samtang ang apo niini ang nakit-an na lamang nga wala nay kinabuhi nga natabunan ug mga sin.
Sa karun padayon pa ang imbestigasyon sa BFP Alabel aron masuta kung unsa gayud ang hinungdan sa pagkasunog sa balay sa mga biktima. (RV)
