Lakewood, Zamboanga del Sur – Patay na nga napalgan sa kasagbutan nga bahin sa Purok 5, Barangay Biswangan, Lakewood, Zamboanga del Sur ang usa ka 43-anyos nga mag-uuma nga gitoohang giunay pagluba sa iya ra usab nga kainom.
Naila ang biktima nga si Dominador Becada Manginsay, residente sa naasoy nga lugar.
Naglusad usab og hot pursuit operation ang tropa sa Lakewood MPS, hinungdan nga nadakpan ang suspek nga nailang si Michael Timod Anggot, 42 -anyos, mag-uuma ug mulupyo usab sa maong dapit.
Base sa iniyal nga imbestigasyon ang biktima ug suspek nagtagay sa tindahan nga gipanag-iyhan ni Narciano Anggot apan sa lintunganay sa ilang inom nisangpot kini sa panaglalis.
Ang biktima nga si Dominador nipauli sa ilang pinuy-anan aron makalikay sa kagubot apan gisundan kini sa suspek og didto gidabodabohan og luba sa nagkadaiyang bahin sa lawas hangtud namatay.
Gi-andam na sa kapulisan sa lungsod sa Lakewood ang kaso nga isang-at sa nadakpan nga suspek.
