Davao City- Patay ang usa ka mag-uuma human gipusil alas 5 sa buntag nahitabo sa Sitio Mangani Proper, Brgy Tapak, Paquibato District, siyudad sa Davao.
Subay sa report gikan sa Davao City Police Office (DCPO) naila ang biktima nga usa ka Darwin Latawan, 42 anyos, nagpuyo sa nahisgutang lugar samtang ang mga suspek mao ang mga mag-amahang sila Estiban Ali ug tulo ka anak niini nga kanhi mga sakop sa Cafgu nga sila Dan Ali, Efren Ali, Abel Ali ug ang ig-agaw nila nga si Bansaon Ali, pulos residenti sa naasoyng lugar.
Sa gihimong imbestigasyon sa Paquibato PNP sa pagpanguna ni SPO1 Luther Napoles, samtang ang biktima didto sa iyang uma nagpakaon sa iyang baboy, kalit niabot ang mga suspek ug usa usa kanila ang mipusil sa biktima gamit ang shotgun diin ang mag-uuma naigo sa dughan nga bahin.
Human sa hitabo daling gitabang ang biktima sa iyang paryente ug gidala sa Southern Philippines Medical Center apan pag-abot sa ospital nakabsan kini og kinabuhi.
Gituohang motibo matud pa nga adunay relasyon ang biktima ug asawa sa suspek nga si Abel Ali.
Ang patayng lawas sa biktima gihaya na sa ilang pinuy-anan sa Sitio Mangani, Brgy Tapak, Paquibato district ning dakbayan.
RadyoMaN Don Pulayao
