Gitingkagul na sa prisuhan ang mag-uumang nasikop sa drug buy-bust operation sa mga kapulisan takna alas 12 sa udto kagahapon didto sa Purok-9, Barangay Poblacion, Valencia City, Bukidnon.
Giila ang suspetsado nga si Renato Sungcad, alyas Tatski, 50 anyos, minyo, mag-uuma, ug residente sa Purok-2, Poblacion, Valencia City.
Nakompiska sa mga otoridad gikan sa suspetsado ang usa ka heat sealed transparent plastic sachet nga mikontinar og ginadiling drogang shabu nga mitimbang og 1.20 gramos ug adunay gibana-banang kantidad nga P8160.00. Narekober usab ang usa ka pouch nga kolor brown ug P500 bill.
Gidala na sa Valencia City Police Station ang dinakpang suspetsado lakip ang mga nakompiskang ebidensiya nga ipagaturn-over sa PNP Provincial Forensic Unit alang sa eksiminasyon.
Samtang ginaandam ang kaso sa paglapas sa RA 9165 kon ang Comprehensive Dangerous Drugs Act of 2002 batok sa nadakpang suspetsado.
Facebook Comments
