Nangayo ug dispensa ang buhatan sa National Irrigation Administration (NIA) Caraga ngadto sa mga mag-uuma ug tag-iya’g basakan sa Brgy. Bancasi ning dakbayan sa Butuan human nadilatar ang pagpa-agas ug tubig sa irigasyon hinungdan nga nangliki na ang basakan ug gikabalak-ang nangadaot ang humay.
Sigun ni Jane Hokirisa, public information officer sa NIA Caraga nga niadtong niaging semana naguba ang irrigation canal nga agi-anan sa tubig mao’ng wala sila nakapa-agas sa mga basakan apan gipaniguru niya nga karon balik na sa normal ang tanan human nakumpleto na ang pag-ayu niini.
Kini ang gihimung pagpasabot sa opisyal dihang usa ka mag-uuma nga taga Brgy. Bancasi ang niapilar sa RMN DXBC Butuan tungod sa maong problema.
Niya pa nga adunay eskedyul ang pagpa-agas sa irigasyon diin ang dapit sa Brgy. Bancasi nga giilang upstream humana napa-agasan sa nilabay’ng semana ug karon nga semana usab naka-eskedyul ang downstream nga mga lugar.
Aminado ang taga NIA nga hinay ang suplay sa tubig karon gumikan sa nasinating kainit sa panahon apan gipaniguru usab nila nga makabastar kini alang sa padayong patubig sa mga basakan.
(VC. NIA 1)
Dugang sa opisyal nga libre na ang irigasyon sa tanang basakan sugod niadtong tuig 2017 agig pagsunod sa balaod nga gipatuman ni Pang. Rodrigo Duterte.
[image: Rice-production.jpg]
