Davao City – Gipahinumdom sa usa ka Non-Government Organization kun NGO nga nagatabang sa mga ginaabusong kababainhan ug kabatan-unan dinhi sa syudad nga kinahanglang adunay patas nga representasyon ang kababainhan ug kalalakin-an diha sa gobyerno.
Kini ang usa sa mga gihisgutan nila RadyoMaN Misel Miral-Galve ug Atlanta Yap, Program Officer sa LUNA Legal Resource Center for Women and Children bahin sa Magna Carta of Women (Republic Act No. 9710) sa programang Serbisyong Straight to the Point sa ‘Ikaw ug ang balaod’ segment.
Gipasabot ni Yap nga kinahanglang 50 % alang sa kababainhan samtang 50 % sa kalalakin-an ang makita diha sa mga key positions sa gobyerno.
Una niini, gipasabot ni Yap nga ang Magna Carta of Women law, usa ka komprehensibong katungod sa kababainhan nga balaod nagkanayon sa pagwagtang sa diskriminasyon pinaagi sa pag ila ug pagprotekta, pagtuman o pagduso sa katungod sa babayeng Pilipino.
Gani lakip sa maong balaod mao ang adunay 2 months leave benefits ang mga empleyadong babae nga nakasinati og gynecological disorder sama sa sakit sa ovary, myoma ug uban pa.
Dugang pa mao ang mahatagan og patas nga access sa scholarship ug training sa hisgutanang edukasyon samtang alang sa mga nabuntis nga teachers ug estudyante, dili himuong ground kini nga ipahawa sa skwelahan ingon man patas nga katungod usab sa kababainhan bahin sa pagpanag-iya og mga propyedad sama sa land title.
RadyoMaN Renz Barbarona
