BACOLOD CITY – Gilayon nga nadakpan ang duha ka mga suspek matapos nga ila ginhold-up ang magnobyo kaina sang kaaahon sa area sang Burgos public market diri sa ciudad sang Bacolod.
Nakilala ang mga suspek nga amo sanday Jake Pineda, 22 anyos ang edad, single kag si Rolen Gonzales, legal ang edad, lunsay pumuluyo sang Brgy. 19, Bacolod City.
Samtang ang mag-nobyo naman nga biktima ginkilala nga sanday Jason Cartin, 28 anyos, sang Brgy. Handumanan kag Jane Angelie Guyoca, 25 anyos, residente ang Brgy. Taculing.
Suno sa mga biktima nga ini sila ang naghalin sa Brgy. Bata matapos nag-attend sa birthday party sang ila abyan kag bangud nga las 3:30 y medya na, naghapit na lamang sila sa Burgos Market agud nga magpangompra.
Apang, ginsugata sila sang amo nga mga suspek, gintayaan sang kutsilyo kag ginkuha ang bag nga may unod nga cellphone kag cash nga isa ka libo ka pesos.
Wala labot sini, ginhurikap pa sang isa sa mga suspek ang pribado nga bahin sang lawas sang babayi kag gilayon nga nagpalagyo.
Dali-dali naman nga nagpadulong sa Police Station 4 ang mga biktima agud ireport ang natabo sa ila gani gilayon nga nadakpan ang mga suspek.
Narecover ang bag apang wala na ang mga unod sini./dyHB BACOLOD
