BACOLOD CITY – Tatlo ang nagkalamatay kag apat ang nasamaran sang nabungguan sang isa ka SUV nga salakyan ang isa ka traysikol pasado la una sini gid lamang nga kaagahon sa Brgy. Villamonte, Bacolod City.
Nakilala ang mga biktima nga nagkalamatay nga amo sanday Erlinda Villar, 60 anyos kag ang iya duha ka mga kabataan nga sanday Melinda Tesoro, 44 anyos ang edad kag Rudelyn Nasis, 31 anyos ang edad, tanan pumuluyo sang banwa sang Murcia.
Samtang ang mga nasamaran naman amo driver sang traysikol nga si Elvis Barcenas, 33 anyos ang edad, Erica Tesoro, 16 anyos, Genalyn Villar, 19 anyos kag Merlinda Barcenas, 57 anyos ang edad, tanan tumandok sang Murcia.
Ang driver naman sang SUV nga Ford Ecosport ginkilala nga si Luigi Malacon, 28 anyos, isa ka nurse kag pumuluyo sang Barangay 2 banwa sang EB Magalona.
Suno sa imbestigasyon nga ang mga biktima nga nagkalamatay kag nasamaran ang nagpadulong sa Corazon Locsin Montelibano Memorial Regional Hospital agud magbisita sa ila amay nga si Rodolfo Villar Sr. nga nagtaliwan sa amo nga ospital.
Antes nagpauli, naghapit pa kag nagkaon sa isa ka food chain sa dalan Lacson ang mga biktima.
Matapos magkaon ini sila ang nagpauli na kag nag-agi sa Brgy. Villamonte, apang sa pag-abot na sa BS Aquino Drive malapit sa Barangay Hall, nasugata sang traysikol ang nagahagunos nga SUV nga nag-agaw sa ila lane kag ini sila ang nabungguan.
Base pa sa inisyal nga imbestigasyon, ginaalegar nga nakainom ang driver sang SUV kon diin detained na ini karon sa custodial facility sang Police Station 4./dyHB BACOLOD
