General Santos City—Kritikal ang kondisyon sa usa ka amahan samtang angol sab ang asawa niini human gipamusil sa wala pa mailhing suspek alas 7:10 ang takna sa kagabie, nobyermbre 25, 2018 sa may Silway 8 Road, Polomolok, South Cotabato.
Giila ang mga biktima nga silang si Rogelio Butay, 48 anyos ug Arlene Butay 48 anyos, fruit vendor ug residenti sa Purok Honey, barangay Silway 8, Polomolok.
Sa imbistigasyon sa Polomolok PNP nasuta nga pauli na unta ang mga biktima gikan sa ilang pwesto sa may National Highway uban sa duha niini ka mga anak nga minor de edad dihang kalit lang matud pa silang giharang sa duha ka mga suspek dayon gipusil pila ka higayon.
Si Rogelio nakaangkon ug samad sa iyang liog ug ulo nga bahin, samtang samad sa paa ang naangkon sa iyang misis.
Paspas nga misibat ang mga suspek sa wala masayring lugar samtang ang mga biktima gidala sa ilang 14 anyos nga anak sa usa ka ospital sa Polomolok. Human sa pipila ka oras gibalhin sa General Santos City Doctors Hospital si Rogelio gumikan sa kritikal niining kahimtang.
Sa karon ginasuta pa sa kapulisan ang motibo sa maong krimen.
