Patay ang magtiayon human kini gipusil sa riding in tandem, pasado alas-8:00 kagahapon sa buntag, Miyerkoles, Septembre 4, sa Purok 4, Barangay Candis, Tubod, Lanao del Norte.
Gi-ila sa kapulisan ang mga biktima nga sila si Alimoden Mamao, 58 anyos ug ang asawa niini nga si Babai Mamao, 49 anyos, mga residente sa Purok 5, Barangay Bulacon, sa lungsod sa Salvador.
Matud pa ni Major Salman Saad, information officer sa Provincial Police Office sa Lanao del Norte, ang mga biktima sakay sa motorsiklo dihang gisundan sila sa mga suspek nga sakay sa laing motorsiklo ug gipusil.
Namatay ang mga biktima samtang gidala paingon sa tambalanan.
Usa ka residente ang samaran human kini naigo sa saag nga bala.
Sa usa ka pursuit operation, nasapon sa mga utoridad ang duha ka mga suspek basi sa asoy ug paghulagway sa saksi.
Naila kini sila nga si Hamja Acampong, 32 ayos ug Nicole Valendes, 20 anyos, pulos mga residente sa Purok 2, Dableston, lungsod sa Sultan Naga Dimaporo.
Nakumpiska sa mga utoridad gikan sa duha ang usa ka kalibre 45 nga pistola nga adunay empty magazine.
Gipailawom na sa imbestigasyon ang duha.
