Pabiling nakakustudiya karon sa Kitcharao PNP ang magtiayong miyembro sa Guerilla Front 16 sa New People’s Army nga sila si Luzviminda Apolinaria, 45 anyos ug Aladin Apolinaria, 49 anyos.
Ang duha giaresto sa hiniusang operasyon sa PNP ug 29th IB Phil. Army didto Purok 7, Barangay Mahayahay, Kitcharao, Agusan del Norte, 10:35 niadtong sabado pinasikad sa warrant of arrest sa kasong violation of Republic Act (RA) No. 9208 kun Expanded Anti-Trafficking in Persons Act of 2012 ug Violation of RA7610, Anti-Child Abuse Law nga giisyu sa 10th Judicial Region Branch 34, Cabadbaran City, Agusan del Norte.
Pamahayag ni Lt. Col. Glenn Joy Aynera, 29th IB Phil. Army Commander responsible ang magtiayon sa pagpangrecruit ug mga menor de edad nga pasudlon sa kalihukan hinungdan sa kasong ilang giatubang.
Pipila sa mga narecruit nga una nang misurender niadtong buwan sa Disyembre nga maoy nagsilbing witness mao sila si Glenie Omahas kun Ka Dave, Garry Alimboyong alyas John ug Rudy Alimboyong alyas ka Bunso.
Matud pa menor de edad pa lamang dihang girecuit sa maong mga magtiayon.
