Usa ka kanhi armado’ng magtutudlo sa tribal Filipino Program of Surigao del Sur (TRIFPSS) ang bolontaryong mitahan ngadto sa 36th IB Philippine Army diin bitbit niya ang usa ka carbine rifle ug magazine nga adunay daghang mga buhing bala.
Giila ang nagsurender nga si “alyas Val”, 25 anyos, ulitawo, membro sa tribong Manobo ug residenti sa So. Baroboan, Brgy. Carromata, San Miguel, Surigao del Sur.
Nagsilbi usab siya’ng Milisyang Bayan (MB) sa SYP-1, SRC 2130 sa North Eastern Mindanao Regional Committee (NEMRC).
Nasayran nga nadani si alyas Val nga magtudlo sa TRIFPSS niadtong Mayo 20, 2012 hangtud Enero 25, 2017 tungod sa saad nga makadawat ug tabang pinansyal ang iyang pamilya samtang magtudlo kini ug moapil sa armadong pakigbisog.
Apan gumikan kay wala na mag-operate ang TRIFPSS sa maong lugar tungod sa paningkamot sa 36th IB, lider sa lumad ug Department of Education (DEPED), maoy rason nga nagsurender si alyas Val.
Gusto niya usab nga magpuyu’ng malinawon ug walay kahadlok sa tropa sa goberno. Misaad usab siya nga motabang sa kagamhanan sa paningkamot nga makab-ot ang tinuod nga kalinaw ug proteksyon sa kultura ug integridad sa komunidad sa tribu.
[image: val.jpg]
