BACOLOD CITY – Nagsaka ang kaso sang robbery ukon kinawatay sa ciudad sang Bacolod sa bulan sang Hulyo tubtub sini nga Agosto.
Ini ang gin-ako ni Bacolod City Police Office, OIC City Director S/Supt. Jack Wanky kon diin suno sa iya, ang nagapanguna nga mode sang pagpangawat amo ang hold-up, akyat bahay, buka kotse kag baklas bubong.
Suno kay Wanky nga sa karon ila na na-identify ang duha ka dalagkuan nga mga grupo sang kawatan sa Bacolod kag na forward na nila sa Campo Crame agud madala sa reward system para ini sila ang madasig nga madakpan.
Ginpasalig ni Wanky nga ila pa pabakuron ang police visibility ilabi na sa tion sang kabag-ihon kag kaagahon.
Sa pihak nga bahin, nagapati ang hepe sang BCPO nga ang pagsaka sa kaso sang robbery sa Bacolod ang may kaangtanan sa pagnubo sang supply sang illegal drugs.
Ginpahayag ni Wanky nga base sa ila narecover nga text messages halin sa mga robbery suspect, ila nakita ang sugilanon nga nagapamatuod nga dapat magpangawat ang suspek agud may inugbakal shabu.
Pahayag pa ni Wanky nga ang pila ka grupo sa robbery hold-up sa Bacolod ang may yara sang kaangtanan sa pagduso sang illegal drugs./dyHB BACOLOD
