Aabot sa mahigit P26,000 halaga ng pinaniniwalaang iligal na droga ang nakumpiska ng pulisya sa dalawang magkahiwalay na buy-bust operations na isinagawa noong Marso 20, 2026, na nagresulta sa pagkakaaresto ng tatlong suspek sa Bayambang.
Sa unang operasyon bandang 12:30 ng tanghali sa Purok 6, Barangay Managos, nagtulungan ang mga tauhan ng Bayambang Municipal Police Station at PDEA Regional Office 1 upang isagawa ang buy-bust operation laban sa ilegal na droga. Dalawang suspek—isang lalaki at isang babae—ang naaresto matapos bentahan ng umano’y “shabu” ang isang pulis na nagpanggap bilang poseur buyer.
Matapos ang pag-aresto, nakumpiska mula sa lalaking suspek ang P500 buy-bust money at isang karagdagang sachet ng hinihinalang shabu. Isang sachet naman ng kaparehong substansiya ang narekober mula sa babaeng suspek. Tinatayang may kabuuang bigat na 3 gramo ang nasamsam na droga na nagkakahalaga ng P20,400.
Samantala, sa ikalawang operasyon bandang 8:10 ng gabi sa Purok 3, Barangay Pugo, isang lalaki ang inaresto matapos mahuling nagbebenta rin ng hinihinalang shabu sa poseur buyer.
Narekober mula sa suspek ang P500 buy-bust money at isa pang sachet ng pinaniniwalaang shabu. Ang kabuuang bigat ng nakumpiskang ebidensya ay tinatayang 1 gramo na may halagang P6,800.
Ang lahat ng suspek ay haharap sa kasong paglabag sa Seksyon 5 (illegal sale of dangerous drugs) at Seksyon 11 (possession of dangerous drugs) ng Republic Act 9165 o ang Comprehensive Dangerous Drugs Act of 2002. Kasalukuyan nang inihahanda ang mga dokumento para sa pagsusumite ng kaso sa tanggapan ng piskalya. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
