Roxas City, Capiz – Liwat nga nagpangayo sang pasaylo kag pag-intindi ang pamunoan sang Metro Roxas Water District(MRWD) sa water concessionaires sini angut sa nagakatabo nga low water pressure tubtob kadulaan sang supply sang tubig sa pila ka lugar.
Base sa ginpaguha nga abiso sang MRWD, ini ang bangud sa presensya sang contaminants tuga sang pagluntad sang algal bloom sa Paslang River nga amu ang source sang tubig sang MRWD.
Bangud sini, pila na ka mga tikang ang ginpatigayon agud nga mapasiguro ang safe kag malimpyo nga klase sang tubig nga nagaguha sa mga gripo.
Ini ang ginalakipan sang pagbutang sang mga screen sa pila ka stages sang water treatment process agud nga malikawan ang pagsulod sang lumot(algae) sa water treatment plant.
Ila man gindugangan ang dosage sang chlorine gas agud nga madula ang baho sa tubig.
Bangud sini, ginakinahanglan ang backwashing agud nga malimpyohan ang filter media sang water treatment facility nga nagaresulta sang malubog nga tubig nga nagaguha sa mga gripo.
Ginpasalig sang MRWD nga sa labing madali nga panahon, ila nga masolusyonan ang nasambitan nga mga problema.
Sa madumdoman sang nakaligad nga mga sinemana, nag-ani sang mga pagbatikos ang Metro Roxas Water District bangud sa kadulaan sang supply, malubog kag mabaho nga klase sang tubig.
in photo | source sang tubig sang MRWD kun sa diin may yara sang algal bloom
