HINIGARAN, NEGROS OCCIDENTAL – Desidido nga magpasaka sang kaso ang isa ka amay matapos nga napatay ang iya bata nga suno sa iya ginpabay-an sa ospital sa banwa sang Valladolid, Negros Occidental sadtong Pebrero 28, 2018.
Ang complainant nakilala kay Mario Abas, amay sang biktima nga napatay nga si Marian Abas, 14 anyos ang edad, isa ka grade 9 student kag pumuluyo sang Sitio Canonoy, Brgy. Miranda, banwa sang Hinigaran.
Suno sa panaysayon sang amay nga sadtong February 27, 2018 mga las 7 sang gab-i nagreklamo ang ila bata nga si Marian nga tuman ka sakit sang iya tiyan gani gindala nila ini sa Valladolid District Hospital.
Pahayag ni Mario nga wala gilayon gin-atindir ang iya bata kag mga las 10 sang gab-i sang ginkuhaan laboratory kag gin-inject sang bulong nga wala sila nakahibalo kon para sa ano.
Dugang pa sang amay nga bisan ano nga reklamo ang iya ginahambal sa doctor on duty sa amo nga tion, wala siya ginasapak.
Pag-abot sang mga la 1:45 na sang kaagahon, naglala na ang sitwasyon sang bata kon diin na-comatose na si Marian gani gin-refer na sang Valladolid District Hospital nga dal-on sa Bacolod ang pasyente.
Siya pa ang ginpapangita sang ambulansya sa diin ang iya nakita nga ambulansya, nag-abot mga 45 minutos ang nakaligad matapos nga siya ang nagtawag.
Pebrero 28, pasado las 11 sang aga sang gin-declare nga patay na ang bata sa Corazon Locsin Montelibano Memorial Regional Hospital.
Ang findings sang mga doktor, may buho gali ang heart sang biktima kon diin wala nakahibalo ang ginikanan nga may kasubong gali nga balatian ang ila anak.
Sa karon ginahulat naman ang statement nga igapagwa sang Valladolid District Hospital angut sa amo nga insidente./dyHB BACOLOD
