General Santos City–Aduna nay person of interest nga ginasundan karon ang Maitum Municipal Police Station kabahin na sa brutal nga pagpatay sa usa ka 16 anyos nga si Alyas Inday nga nanimuyo sa barangay Zion , Maitum, Sarangani Province human nga nakit-an nalang kining wala nay kinabuhi sa kalasangan nga bahin sa Barangay Batian sa susamang munisipalidad alas 2:00 sa kaadlawon nga wala nay senina ug gisulod sa sako.
Sumala pa ni PCI Rodel Javison ang hepe sa Maitum Municipal Police Station nga sa karon aduna na silay gimugna nga duha ka mga team aron maoy mutotok sa kaso kung asa gipasundan na matud pa niini ang ilang gidudahang suspect sa kabukiran ug kung ang mga ebidensya nga ilang nakalap ang mutudlo sa suspect ilaha kining pagasikopon ug pasakaan ug tukmang kaso.
Dugang pa ni PCI Javison nga mibisita lang sa iyang iyaan ang biktima niadtong tungura gumikan wala silay klase sa brgy. Ned, Lake Sebu, South Cotabato.
Padulong unta sa Barangay Batian ang biktima kauban ang iyang iyaan ug uyuan nga naga baktas apan sa dihang adunay miagi nga motorsiklo nisakay ang mga kauban niini ug nagpabilin ang biktima.
Apan nagabie nalang wala gihapon nakauli ang nasangpit hinungdan nga nangayo na ug tabang ang iyaan niini sa otoridad aron pangitaon ang nasangpit apan patay na dihang kini nakaplagan ug nasulod na sa kaso. (Dave Silagan)
