BACOLOD CITY – Wala sang pagbag-o, wala sang asenso. Ini ang reaksyon sang City Election Officer Atty. Mavil Majarucon-Sia angot sa pagdagsa sang mga magaparehistro sa COMELEC Bacolod sa katapusan nga adlaw – November 30.
Suno kay Sia nga wala sila nagkulang sa pagpahibalo sa publiko nga bilog nga bulan sang Nobyembre lakip na ang adlaw nga Sabado, bukas ang opisina sang Comelec para sa rehistrasyon sa Barangay kag SK elections nga patigayunon sa masunod nga tuig.
Dugang pa ni Sia nga ‘batasan’ ukon ‘attitude’ gid sang mga Pilipino nga mag-giho lang sa adlaw sang deadline.
Gina-target kuntani sang Comelec Bacolod ang 5 mil ka mga bag-o nga registered voters apang base sa ila projection magalab-ot lang ini sa 3 mil ka mga botante.
Ginbaton pa sang Comelec ang mga nagpila tubtob alas 3 kaina sang hapon.
