Giklaro karon sa Palasyo sa Malacañang nga wala pa diay napagawas sa merkado ang bugas nga gipalit sa gobyerno gikan sa Thailand ug sa Vietnam.
Kini ang gibutyag ni Presidential Spokesman Secretary Harry Roque human niini gipahibalo sa iyang press briefing kaganiha nga naana sa merkado ang 250-mil ka metriko toneladang bugas sa National Food Authority nga gipalit sa gobyerno.
Gibawi usab ni Roque ang iyang unang pamahayag nga nasa 36 hangtud 38 pesos kada kilo ang NFA Rice sa merkado.
Giklaro sa Kalihim nga ang 36-38 pesos kada kilo mao ang presyo sa commercial rice sa merkado ug ang NFA Rice naa sa 27 hangtud 32 pesos kada kilo ang presyo.
Giklaro usab niini nga bisan naana sa nasud ang gipalit nga bugas wala pa kini nakalat sa merkado tungod kay nasa pantalan pa sa Subic ang maong mga bugas tungod sa grabeng pag-ulan niadtong nakalabayang semana.
Pero matud niini nga bisan wala pa napagawas sa merkado ang gipalit nga bugas sa gobyerno, nagsugod nang niubos ang presyo sa commercial rice sa merkado.
