Sarangani Province–Holiday karong adlawa, adlaw nga Miyerkules, Nobyembre 28, sa tibuok probinsya sa Sarangani. Kini ang deklarasyon sa Malakanyang pinasubay sa Proclamation No. 630 nga gipirmahan sa Executive Secretary ni Pangulong Rodrigo Duterte nga si Secretary Salvador Medialdea.
Nakigduyog ang Malakanyang sa kasumaran sa pagkamugna sa Sarangani Province human sa pagkasiak niini sa South Cotabato baynte-sais (26) katuig na ang nakalabay. November 28, 1992 mao ang petsa kung diin unang nakaangkon og ginatawag nga “corporate existence” ang Provincial Government sa Sarangani pinaagi sa pagkapili sa unang eleksyon sa mga provincial official gipangunahan kaniadto nila Congressman James Chiongbian og Gobernadora Priscilla Chiongbian, mga apuhan ni Governor Steve Chiongbian Solon.
March 16, 1992 na-aprobahan ni Presidente Ferdinand Marcos ang balaod nga gipanday ni Congressman Chiongbian ang Republic Act No. 7228 nga nagmugna sa Sarangani, adunay plebisito nga nahitabo og pagka-Nobyembre nilingkod ang first set of provincial officials.
Samtang ang pulong “MunaTo” ang gikan sa pinulungang Blaan nagpasabot nga first people, unang mga tao. Unang mga tao nga naningkamot ma-separar ang Sarangani sa South Cotabato. Unang mga tao usab sa kasaysayan sa Southeast Asia kung diin nadiskubre tuig 1991 sa usa ka kweba sa Barangay Pinol, Maitum ang mga anthropomorphic burial jars naila sa tawag nga Maitum Jars nga gituuhan nga nahulma kini panahon pa sa Metal Age gikan 5 B.C. o before Christ nagdala sa history dili lang sa Mindanao kundili sa Pilipinas.
Giimbitahan na lamang ni Board Member Rosemarie Sayo, ang chairperson sa komitiba sa turismo sa Sangguniang Panlalawigan, duyog sila Governor Solon, Vice Governor Elmer De Peralta og mga board member hilabi na sila Board Members Bobot Martinez, Jong Falgui og Jet Bascuña, ang tanang katawhang Sarangan og mga bisita nga saksihan karong adlawa ang unang adlaw sa kasaulugan sa ika-26 nga foundation anniversary og ika-16 nga MunaTo Festival.
Pagasugdan alas 5 sa kadlawon ang Fun Run, og muabri gayud dayon sa adlawan ang Municipal Village, Fabli Guni agri-fair, Cultural Exhibition sa Kasfala Hall makauban ang Gawad sa Manlilikha ng Bayan awardee Bai Estelita Bantilan, Sea and Forest Wildlife ECPCP Museum may makita pang mga sawa, buwaya, halo, parrot, unggoy, banog, mga tilapia nga ga-foot spa, upland rice og mga pelikulang pang-kinaiyahan, og ang National Flowerhorn and Beta Show Competition.
Karong adlawa pud mahitabo ang ikapito (7th) katuig na nga pagpahigayon sa Transport Summit, may pa-boxing tournament pa sa Capitol Ground. Labaw sa tanan, ang Employees Day nga salmutan dili lang sa mga empleyado sa Kapitolyo kundili sa mga empleyado usab sa pito (7) ka munisipyo.
