General Santos City—Padayon pa ang gihimong imbistigasyon sa kapulisan sa pagpamusil patay sa Barangay Kagawad sa Barangay Lun Padidu sakop sa munisipyo sa Malapatan, Sarangani Province nga si Rene Kamid, hingkod ang panuigon, nanimuyo sa Purok Upper, Masagana sa nasangpit nga barangay , alas 8:30 sa buntag human kining gipusil sulod sa panimalay niini sa wala mailhing mga suspek nga nakamotorsiklo.
Sumala pa ni Police Major Benjie Ancheta, Chief Of Police sa Malapatan, Municipal Police Station nga blangko pa sila sa motibo sa kamatayon sa maong kagawad ingon man ang pamilya niini gumikan kay basi sa pamahayag sa mga kaubanan niining mga opisyal sa Barangay, wala matud pa silay nasayran nga dunay nakalaban ang biktima.
Sa karon mas gipalawman pa sa kapulisan ang imbistigasyon sa maong pagpamusil aron nga masayran unsa gyud ang tinuoray nga motibo sa pagpamusil patay.
Gibutyag usab ni Police major Ancheta nga usa sa ilang sutaon kung duna bay koneksyon sa illegal drugs ang pagpatay sa Kagawad . kahinumduman nga una nang gialigaran ang maong opisyal pipila na ka tuig ang nakalabay nga duna siay kalabutan sa droga ug sa paghupot ug armas. Gani gipailawom na kini sa raid kaniadto apan nadissmiss ang iyang kaso human nga iyang napamatud-ang wala syay gihuptang armas ug wala usab siya kalambigitan sa droga.
Nasayran nga igo rang nangape ang biktima sulod sa ilang panimalay apan kalit kining gipusil sa mga suspek diin nakaangkon ang biktima ug samad sa iyang kalawasan ingon sa iyang ulo nga bahin nga hinungdan sa iyang kamatayon. Gamit matud pa sa suspek sa pagpamusil ang kalibre 45 nga armas.(RV)
