BACOD CITY – Gin-inagurahan subong nga adlaw ang Malasakit Center nga nahamtang sa Corazon Locsin Montelibano Memorial Regional Hospital(CLMMRH).
Ang inagurasyon ginpangunahan ni Special Assistant to the President (SAP) Bong Go.
Suno kay Go nga paagi sa Malasakit Center mas madamo pa gid nga mga pigado ang mabuligan bangud isa ini ka sahi sang Help-One-Stop-Shop.
Sa sulod sang building, makit-an ang mga counters kaangay sang para sa PWD kag Senior Citizen.
May counter man para sa mga regular nga transaction sa mga opisina sang DSWD, PCSO, Philhealth kag may isa ka Special Desk para sa naga kinahanglan sang dugang nga bulig kun may balayran pa nga nabilin sa ospital pananglitan nga napalapitan na ang iban nga mga ahensya sa Malasakit Center.
Gin turn-over man ni Go kay Doctor Julius Drilon, Chief sang CLMMRH ang inisyal nga pondo nga nagabalor sang lima ka milyon ka pesos kag kon maubos na ini nga kantidad liwat nga magapasulod sang dugang nga lima ka milyon gikan sa Office of the President.
Magluwas sa CLMMRH nagbukas naman ang Malasakit Center sa Cebu, Manila, Iloilo, Palawan kag Surigao.
Nagtambong naman sa kahiwatan si Presidential Assistant to Visayas Michael Lloyd Diño, Bacolod Lone District Congressman Greg Gasataya, Bacolod City Mayor Evelio Leonardia kag Vice-Mayor El Cid Famillaran lakip man si Silay City Mayor Mark Andrew Golez. / Grace Supe
