Pinatitiyak ni Senator Ramon “Bong” Revilla Jr., sa gobyerno ang malinis at murang tubig para sa lahat ng mga Pilipino.
Ito ang binigyang-diin ng senador kasabay ng kanyang pagbibigay suporta sa Executive Order 22 ni Pangulong Ferdinand ‘Bongbong’ Marcos Jr., para sa pagbuo ng Water Resource Management Office.
Sinabi ni Revilla na napapanahon ang pagbuo ng tanggapan habang patuloy pa ang pagbusisi sa panukala sa Senado para sa paglikha ng water regulatory commission sa gitna na rin ng nakaambang krisis sa tubig sa panahon ng tag-init.
Batay sa datos, sa 109 milyong Pilipino ay nasa 57 milyon ang sumusugal sa hindi tiyak kung malinis ang tubig ang kanilang ginagamit at nasa 11 milyon naman ang wala talagang mapagkukunan ng ligtas na inuming tubig sa pang-araw-araw nilang buhay.
Dahil dito, nais ni Revilla na magkaroon ng polisiya para sa water supply at isaayos ang organizational functions at responsibilities ng Metropolitan Waterworks and Sewerage System, National Water Resources Board at Local Water Utilities Administration sa iisang komisyon.
Ang panukala ay naglalayong isailalim ang iba’t ibang economic at administrative regulation ng water utilities sa iisang komisyon, upang maiwasan ang sapawan at maihatid ng maayos ang serbisyo.
