DON SALVADOR BENEDICTO, NEGROS OCCIDENTAL – (UPDATE) Ginapaabot nga magapagwa sang resulta sa ila imbestigasyon ang Vallacar Transit Inc. (Ceres Liner) angut sa natabo nga pagkahulog sang isa sa ila bus sadtong Lunes sang gab-i sa Brgy. Igmayaan, banwa sang Don Salvador Benedicto.
Ang amo nga aksidente nagtuga sang kamatayon sang 4 sini ka mga pasahero kag pagkasamad sang 8 ka iban pa lakip na diri ang driver kag conductor sang amo nga bus.
Angut sini, nakilala na ang mga biktima nga nagkalamatay nga amo sanday Flores Alo sang Brgy. Banago, Bacolod City, Jason Manaba, residente sang Brgy. Malanog, Calatrava, kag ang mag-iloy nga sandasy Rainera kag Christian Jude Leonida, pumuluyo sang Brgy. Tangub, Bacolod City.
Samtang, nasamaran naman sanday Jean Layumas sang San Carlos City, Jude Carlo Dio-an sang banwa sang Manapla, Jun Rey Trabajar sang Don Salvador Benedicto, Jun Moyeta sang Brgy. Mandalagan, Bacolod City, Dian Leonida sang Brgy. Tangub, Bacolod City, Romeo Alo sang Brgy. Banago kag ang driver sang bus nga si Jasser Rasonable kag conductor nga si Mark Reovaca lunsay pumuluyo sang Brgy. Mansilingan, Bacolod City.
Sa pihak nga bahin, natigayon na nga ma-retrieve ang amo nga bus halin sa pil-as kon diin ini ang nahulog.
Bwas sa aga magapatigayon naman sang misa ang Vallacar Transit management sa Salvador Benedicto, ang lugar sang aksidente./ Photo courtesy of Amity Volunteer Fire Brigade
