General Santos City—Naghatag ug ayuda ang managsuong Pacquiao sa pipila ka mga lugar sa Sarangani Province kagahapong adlawa.
Ang Lungsod sa Alabel maoy usa sa mga nakabinipisyo sa Pamaskong Handog nilang ni Sarangani Congressman Ruel Pacquiao, Sen. Manny Pacquiao ug OFW Partylist Representative Bobby Pacqiao kagahapong adlawa, dungan sa ika 42 ka tuig nga adlawng natawhan ni Sen. Manny Pacquiao.
Matud ni Congressman Ruel Pacquaio ang programang Pamaskong Handog nilang managsuon nahimo nang tradisyon sa matag tuig isip pagpasalamat sa tanang mga nisuporta ngadto kanila ug sa tanang mga nagatuo ngadto sa ilang katakos isip mga opisyal sa gobyerno.
Dugang pa sa Kongresista nga ang ayudang ilang gihatag sa katawhan kinasingkasing gyud isip pahalipay usab ngadto na sa katawhang nanginahanglan hilabi na karon nga nasinatian ang Pandemya.
Aminado si Congressman Pacquiao nga kung itandi ang sitwasyon kaniadtong mga nanglabayng katuigan, lahi gyud ang sitwasyon karon gumikan adunay daghang mga protocol nga ginapatuman sama nalang sa pagsub-ob ug facemask, faceshield ug pagpatuman ug social distancing apan luyo niini dili kini nahimong babag sa paghatag nila ug ayuda sa katawhan.
Nasayran nga gawas sa Alabel, nanghatag usab sila ug ayuda sa katawhan sa Maasim, Sarangani Province ug uban pang lugar sa Sarangani ug Gensan.
Samtang dungan usab sa adlaw nga natawhan ni Sen. Manny Pacquiao, nanghinaot si Congressman Ruel Pacquiao nga magpadayon lang ang iyang igsuon sa pagserbisyo sa katawhan sa tibuok nasud ug hatagan pa kini ug maayong panglawas aron mapadayon niya ang pagserbisyo ngadto sa katawhan.
