Davao City – Gideklarang dead on arrival ang usa ka mananagat human kini kalit gipusil sa wala mailhing suspetsado alas 11:30 sa buntag sa Brgy. Bato, Sta. Cruz, Davao del Sur.
Sa record sa Philippine Regional Office 11 (PRO XI), ang biktima mao si Edwin Burahan Hasan alyas Lolong, 36 anyos, mananagat ug residente sa nasangpit nga lugar.
Sa inisyal na imbestigasyon sa kapulisan, nasayran pinaagi sa witness nga adunay SUV nga walay plate number ang nagsige og park sa national highway diin kapin sa 100 ka metros ang gilay-on sa crime scene.
Sa pag-agi ni Lolong pauli sa ilang balay, adunay kalit nga pagbuto gikan sa baril ug mao usab ang pagkatumba sa biktima.
Daling gidala sa Davao del Sur Provincial Hospital si Lolong aron matambalan apan gideklara na kining dead on arrival sa attending Phycician nga si Dra. Marjorie Clapano.
Kasamtangang nagapahigayon og follow-up investigation ang mga personahe sa Sta. Cruz Municipal Police Station alang sa pag-ila sa suspetsado ug ang motibo niini sa pagpusil-patay sa maong biktima.
RadyoMaN Jason Amisola
