Dipolog City – Kritikal karon sulod sa balay tambalan ang usa ka mananagat dihang nakahiagom ug duha ka samad dinunggaban sa iyang lawas human dunggaba sa kauban niini sa inum pasado alas 6:30 kagabii diha sa Barrio Lapok, Barangay Barra, dakbayan sa Dipolog.
Ang biktima naila nga si Jonathan Aragate Amante, 47 anyos, minyo usa ka mananagat nga dunay postal address nga taga Barangay Sepolan, Lungsod sa Manukan ning Lalawigan ug temporaryong nagpoyo sa Barrio Lapok, Barangay Barra.
Samtang ang supetsado naila sab nga si Mario Gatilao Manalo, 53 anyos, minyo, usa sab ka mananagat, taga Purok Reverside sa maong Barangay.
Sa inisyal nga imbestigasyon sa niresponding kapolisan sa dapit hitaboan, ang duha nag-inom sa ilimnon nga makahubog sa maong dapit.
Dihang nalango sa bino, nautingkay ang bag-ohay nga bikil nga neresulta sa sinumbagay.
Ang suspetsado nilanit sa giluklok na kutsilyo nga dunay gitas-on 16 pulgadas, gihansakan kaduha ka higayon ang biktima nga maayong pagkabuslot sa kilid sa lawas.
Ang nagkadugo nga bikitma daling gihatud sa mga mulupyo sa Zamboanga del Norte Medical Center, ug anaa pa sa talandungon nga kahimtang sumala pa ni Dr. Darryl Quiachon, MD.
Ang suspetsado giaresto gilayon sa nirespondeng mga polis sa pagpangulo ni SPO3 Rey Marcojos.
Kinsa kasamtangan gipriso sa Dipolog City Police Station. (-r.m-)
