Davao City – Hangtod nga walay balaud o memorandum aron pugson nga ipahibalo ngadto sa publiko ang matuod nga kahimtang sa mga nagpositibo sa COVID_19, dili pweding ipahibalo kini sa publiko.
Sumala ni Davao City Third District Councilor Joselle Villafuerte, Committee on Health chairperson, dili mamahimong ibulgar sa publikoang maong datos tungod kay makonsidera kini nga confidential.
Giingon sa konsehala nga mag-agad usab kini sa pasyente o tawo kung mosugot ba siya nga ipahibalo sa publiko ang iyang kahimtang.
Dugang ni Villafuerte nga aron maprotektahan ang pasyente batok sa diskriminasyon ug stigma sa ilang kabanay, angay nga kwidaw kita sa pag-disclose ning sensitibong inpormasyon.
Samtang gipasabot usab ni Villafuerte nga base sa Mandatory Contact Tracing Ordinance sa syudad, pangayoan og mga datos ang mga tawo nga mosulod sa syudad aron dali lang ang pag-trace kanila sa higayon nga adunay matigayong outbreak, apan dili ipahibalo sa publiko ang vital personal information sa tagtungod.
RadyoMaN Bernard Pantallon
