Davao City – Gibarugan sa Alliance Against Aids in Mindanao Incorporated nga supak sa balaod ang Mandatory HIV Testing nga gisugyot kini gumikan sa padayon nga pagsaka sa maong balatian sa tibuok nasud.
Gibutyag ni ALAGAD MINDANAO Focal Person Alma Modragon nga hugot gidili sa balaod ang pagpugos sa usa ka tawo nga magpailawom sa Mandatory HIV testing.
Ang HIV padayon nagdala og seryosong hulga sa panglawas diin matag adlaw dili muminos sa 32 ka bag-ong kaso ang natala kung asa ang pinakabata nga nagsakit nag-edad og 15 anyos ug kabahin na kini sa 62 porsento sa mga batan-ong nagsakit og HIV.
Apan gitindugan ni Mondragon nga ang HIV Test himoong boluntaryo ug dunay pagtugot sa hingtungdan ug dili puguso subay sa republic act 11166 kun Philippine HIV-AIDS Policy Act of 2018 nga gipirmahan ni Pangulong Rodrigo Duterte niadtong enero 25, 2019.
Napamatud-an na sa pagtuon nga dili solusyon ang Mandatory HIV Testing inay maghatag hinoon kini og dili maayo nga implikasyon sa mga tawong gikuhaan og blood sample apan mag-negatibo sa resulta.
Kung ipugos ang Mandatory HIV Testing, ang resulta ana manago ang mga tawo ug dili magpakita hilabi na kun sa ilang kaugalingon dili pa sila andam sa pre-counseling ug sa testing.
Sigun ni Mondragon, gikinahanglan ma-edukar ug masabtan sa tawo ang testing og ngano kinahanglan buhaton kini ug kun magpositibo matambagan sila sa lugar nga puwede nilang adtuoan.
Dugang ni Mondragon, ang kadaghang kaso sa HIV-AIDS dinhi sa dakbayan nagpasabot lamang kini nga kuwang pa kaayo ang mga programa nga gipatuman sa hingtungdang ahensiya.
RadyoMaN Joel Viray
