Suno sa impormasyon nga nakuha sang RMN Iloilo nga sa Abril 3, 2018, natalana pa tani nga liwat pagakaslon sa iya asawa nga si Mae Aguilar bilang kabahin sang ila silver anniversary.
Naka set na ang tanan sa espesyal nga adlaw sang ila kasal sa Alabang bag-o pa man matabo ang pagpang ambush sa ila sang Marso 13, 2018 sa banwa sang Tigbauan, Iloilo.
Sa dugang nga detalye nga nakuha sang RMN Iloilo nga ang sikat nga designer nga si Francis Libiran ang maga desenyo sang gown sang bride lakip na ang suksukon sang groom kag mga entourage sa kasal.
Si Francis Libiran amo man ang nag desenyo sang gown ni Megan Young sang ini ang nagdaug bilang Miss World 2013. Na feature man ini sa “America’s Next Top Model British Invasion” ni Tyra Banks. Madamo man ini sang mga kliyente nga showbiz personalities kaangay nanday Pauline Luna, Maricar Reyes, Kay Abad kag madamo pa nga iban.
Samtang ang isuksok naman sang mga bisita kon tani nga taga Iloilo nga magakadto sa kasal ang pagatay-on naman sang sikat nga designer sa Iloilo nga si Alex Soncio nga amo naman ang organizer sang Miss Iloilo Dinagyang sa madamo na nga tinuig.
Bangod sang natabo nga pagtaliwan ni Mr. Sam Aguilar kagab-i, indi na madayon ang amo nga kahiwatan.
Sa nahibaluan nga gin-ambush si Aguilar sang nagligad nga Martes, Marso 13 sa Barangay Buyuan, Tigbauan, Iloilo sang wala makilal-an nga mga suspetsado sakay sa motorsiklo.
Suno kay Police Senior Inspector Hermogenes Eulatic , hepe sang Tigbauan PNP, napatay si Aguilar kagab-i samtang ginabulong sa The Medical City.
Ginkumpirmar man ni Sta. Barbara Mayor Dennis Superficial , ang doktor ni Aguilar nga alas 11:15 kagab-i nagtaliwan si Aguilar bangud sang multiple organ failure.
Natalana naman nga ipa-idalom sa autopsy examination ang bangkay ni Aguilar.
Nahibaluan nga santo sa report, nakaangkon si Aguilar sang anum ka pilas sa kilid kag likod tuga sang pagkatiro .
Nagapadayon naman ang imbestigasyon sang kapulisan agud makilal-an na ang mga suspetsado kag matul-id ang motibo sang insidente.
